(Update) CAGAYAN DE ORO CITY-Giduot ni dismissed City Mayor Oscar Moreno si Misamis Oriental Gov Bambi Emano nga hinungdan kon nganong gitangtang siya sa Ombudsman sa pagka-mayor dinhi sa syudad.
Nagtoo si Moreno nga panimalos ang katuyuan ni Emano tungod sa iyang pagpildi kaniadto ni kanhi City Mayor Vicente ‘Dongkoy’ Emano sa miaging 2013 elections sa syudad.
Si Moreno miingon nga giplano pag-ayo sa kapitolyo kon unsaon siya pag-ipit sa politika pinaagi sa paglusad sa special audit sa mga transaction nga nasudlan sa iyang administrasyon isip gobernador sa lalawigan kaniadto.
Gitangtang si Moreno tungod sa pag-abang niini sa oil tanker nga wala moagi sa public bidding nga gimando sa balaod.
Gipanghimakak ni Emano nga may kalabutan siya sa subli pagtangtang sa Ombudsman sa pagka-mayor ni Moreno.
Namahayag si Emano nga trababo sa Commission on Audit o COA ang pag-utingkay sa tanang gisudlan nga transaction sa gobierno ilabina nga salapi sa katawhan ang gigamit niini.
Namugos ang gobernador nga nagpataka na lamang si Moreno sa pagpamasangil sa mga tawo nga walay kalabutan sa giingong nahimo niya kasal-anan sa balaod atol sa panahon nga gidumala pa niini ang lalawigan.
Samtang idangop sa kampo ni Moreno sa Court of Appeals o CA Mindanao Station ang pag-dismiss kaniya sa Ombudsman.
Gibutyag sa chief legal counsel ni Moreno nga si Atty Dale Brian Mordeno nga mao kini ang kabahin sa ilang paagi samtang hangyoon ang Ombudsman nga mopagawas sa pabor nga ruling sa iduso nila nga motion for reconsideration.
Namahayag si Mordeno nga tinood nga wala giagi sa public bidding ang rental sa oil tanker apan nasubay usab kini sa negotiated contract ilabina nga naigo sa kalamidad kaniadto ang lalawigan.
Samtang gisupak ni Citizens Watch for Good Governance o CWGG convenor Atty Antonio Soriano ang argumento sa kampo ni Moreno nga gigasto ang buhis sa katawhan nga wala giagi sa public bidding.
Kini maoy kalabutan sa pagrenta kaniadto ni Moreno sa oil tanker aron maoy mangunay pagtubil sa heavy equipment samtang may gitrabaho nga kadalanan sa kalungsuran sa Misamis Oriental.
Namahayag si Soriano nga dili mahitabo nga dili mapaubos check and balance ang transaksyon sa gobierno ilabina nga salapi sa katawhan ang nalambigit niini.
