CAGAYAN DE ORO CITY-Pabilin sa iyang puwesto si City Mayor Oscar Moreno ning syudad.
Kini bisan gisilbi sa Ombudsman pinaagi sa DILG-10 ang lima ka dismissal order batok Moreno sa iyang opisina kagahapong adlawa.
Gibutyag sa abogado ni Moreno nga si Atty Dale Brian Mordeno nga nakakuha sila sa status quo ante order gikan sa Court of Mindanao o CA Mindanao Station.
Nagpasabot kini nga gipabalik sa korte ang katungdanan ni Moreno bisan sa pagtangtang sa Ombudsman batok kaniya.
Una niini,mismo si DILG officer-in-charge Undersecretary Catalino Cuy ang nagmando kang regional director Arnel Agabe sa pag-serve sa order batok Moreno kagahapong adlawa.
Samtang giila ni Moreno nga pagpang-harass ang gihimo nga kaso nga gipasaka ni Engr Antonio Nuñez Jr batok kaniya sa Ombudsman.
Kini human subli gipamugos ni Moreno nga walay kalapasan sa balaod ang ilang pagpatuman sa mga proyekto bisan wala moagi sa public bidding sa Misamis Oriental.
Giangkon ni Moreno nga mibati’g kainit ang iyang political supporters apan nahupay lamang kini sa dihang nalugwa ang status quo ante order gikan sa Court of Appeals pabor kaniya.
Sa pikas bahin,gitawag ni Nuñez nga political drama lamang ang pagsilbi sa dismissal order batok kang Moreno.
Kini human gihagit ni Nuñez ang kampo ni Moreno nga ilugwa ang tinood nga dokumento nga nakuha nila gikan sa Court of Appeals o CA kagabii.
Kini aron masuta kon temporary restraining order o status quo ante order ba ang nakuha ni Moreno aron dili mapatuman ang dismissal order batok kaniya.
Miingon si Nuñez nga kon status quo ante order ang nakuha ni Moreno,daw na pattern na kini sa Ajinomoto tax settlement case kaniadto.
