CAGAYAN DE ORO CITY-Gi-abswelto ni kanhi brgy kagawad Ernesto Molina si City Mayor Oscar Moreno nga nagsugo kaniya aron kasuhan sa kurapsyon ug nepotismo sila si Gov Bambi Emano ug Misamis Oriental Intergrated Sports Council o MOISC General Manager President Elipe sa Ombudsman.
Kini bisan nga unang gitudlo ni Emano si Moreno nga utok sa kaso tungod sa katudluan ni Elipe nga unang gikonbikto sa kasong serious dishonesty ug falsification of public documents sa Ombudsman kaniadto.
Una usab niini,walay lipod-lipod nga giakusahan ni Emano si Moreno nga nag-presyur kang Molina aron sila sang-atan sa kaso nga walay basehan sa Ombudsman.
Samtang dili kumbinsido si Elipe sa rason ni Molina nga nag-inusara kini sa pagsang-at sa kaso batok Emano sa Ombudsman.
Miingon si Elipe nga kini ang pinakadayag nga paagi sa kampo ni Moreno aron pugson si Emano nga mopadagan pagka-mayor sa 2019 elections sa syudad.
Namugos si Elipe nga walay ilegal sa katudluan niini isip general manager sa Misamis Oriental Intergrated Sports Council kay pribadong pasilidad ang Don Gregorio Pelaez Sports Center nga nakabase sa syudad.
Dumduman nga namugos si Moreno nga dili niini binuhatan ang paglutos sa iyang mga kaatbang sa politika inay gisumbalik niya batok sa mga Emano.\
