CAGAYAN DE ORO CITY – Daw nakapunglo sa iyang kasuko si City Mayor Oscar Moreno.
Kini tungod sa pipila ka nga nagpakatag sa fake news nga may gipalugwa nga bag-ong resolusyon ang national IATF nga konohay nagbutang sa syudad sa enhanced community quarantine o ECQ tungod sa sobra ka pagsaka sa mga kaso sa COVID-19.
Kini human unang mikatag sa social media ang resolusyon diin nalatid ang syudad nga kabahin sa giingong gihugtan ang quarantine level sulod sa usa ka bulan.
Una usab niini,gikompirmar ni DILG-10 regional director Arnel Agabe nga nakaabot na sa iyang buhatan ang GCQ request ni Moreno nga gilayon gisaka nila sa national IATF alang sa tukmang aksyon.
Dugtong niini,maapektuha’g balik ang aktibidad sa ekonomiya o pamuhunan sa rehiyon kon tas-a’g balik ang quarantine level sa dakbayan.
Kini ang pagpasidaan ni NEDA 10 regional director Myla Cariño nunot sa tinguha sa city govt nga ibutang sa general community quarantine ang dakbayan gikan sa kasamtangang modified GCQ epekto sa kada-adlaw nga pagsaka sa kaso sa COVID-19.
Miingon si Cariño nga tungod unya niini,maminusan na usab ang business operational capacity sa rehiyon sanglit sentro sa komersyo ang dakbayan.
Hisayrang una nang mi-apektar sa mil-556 ka balay-patigayon ug 32-mil 562 usab ka empleyado ang nawad-a’g panginabuhian tungod sa pandemya.
