Gihingusgan sa Land Transportation Office (LTO) Region 10 ang pagpangdakop sa mga motor nga adunay modified muffler o tambutso tungod sa daghang reklamo sa kasaba ug kasamok nga ginadala niini adlaw ug gabii.
Namahayag si LTO Region 10 PIO Nanding Flores sa Bombo Radyo nga dugay na nilang gipatuman ang pagpangdakop sa mga motoristang milapas sa illegal modification, subay sa Presidential Decree 96 nga nagdili sa paggamit og muffler o tambutso nga makapahinungdan og sobra nga kasaba sa sakyanan.
Matod pa ni Flores, sa bag-ong task force nga gimugna sa lokal nga kagamhanan aron manakop sa mga mulapas sa maong ordinansa sa syudad, impounding sa sakyanan ug multa nga 5,000 pesos ang silot sa mga madakpan.
Kasamtangan usab nga gihan-ay sa Committee on Public Utilities, ubos sa pagpangulo ni Konsehal Enrico Salcedo, ang ordinansa nga magpalig-on sa ipahamtang nga silot aron mahimong unified ang 5,000 pesos nga multa, bisan kapulisan o LTO ang makahimo sa pagdakop sa violator. (James Oliver)
