Dakong problema karon alang sa mga delivery rider sa dakbayan ang epekto sa padayon nga pagsaka sa presyo sa gasolina, sumala ni Art Pia, coordinator sa Riders-CDO.
Iyang gibutyag nga kadaghanan sa mga rider sa syudad independent contractor sa mga kompanya, mao nga sila mismo ang nag-shoulder sa tanang gasto sa gasolina ug maintenance sa ilang motorsiklo, samtang walay kasiguruhan nga tabangan sila sa ilang mga kumpanya.
Matod pa niya, labi na karon nga taas kaayo ang presyo sa gasolina, grabe ang epekto niini sa ilang kinitaan ug sa ilang panginabuhi.
Rason nga midangop sila sa Bombo Radyo aron manawagan ug ipaabot sa ilang mga kumpanya nga kinahanglan unta nga mohatag kini og suporta sa ilang mga riders, ilabi na sa panahon sa krisis.
Gidugang pa ni Pia nga ang pagkahimong independent contractor karong panahona dili sayon kay nagpasabot kini nga ang responsibilidad sa tanang gasto, lakip na ang panlawas, nakasalalay sa rider mismo, nga nagpalala sa kalisod sa ilang sektor.(VC) Inyong nabati ang panawagan ni Art Pia, Coordinator sa Riders-CDO. (By James Oliver)
