CAGAYAN DE ORO CITY – Walay makasuhan kapolisan sa dugu-ong bangga sa duha ka motorsiklo sa Sitio Dinogan,Brgy Sta.Ana,Tagoloan, Misamis Oriental.
Kini bisan kon mi-resulta sa kamatayon sa duha ka motorista ug angkas niini sa pag-head on collision ang gisakyan nila nga mga motorsiklo sa lugar.
Namahayag si Tagoloan Police Station investigator Master Sargeant Arnel Acero nga dead on the spot ang mga biktima nga sila Niño Jay Maniego,23 anyos,ulitawo nga nagmaneho sa Suzuki Raider 150 ingon man ang mag-backriders nga sila Sergio Lianto ug Plong-Plong Villacendo nga sakay usab sa Suzuki 115 nga pulos nagpuyo sa lungsod sa Tagoloan.
Saysay ni Acero nga mismo si Maniego ang misulod sa opposite lane nga gisubay ni Lianto hinungdan sa grabeng impact sa disgrasya.
Gidala pa sa ospital ang mga biktima apan pulos deklarado nga dead on arrival dihang naatiman sa mga doktor sa miaging Biyernes sa gabii.
