CAGAYAN DE ORO CITY – (update) Pakyas nga duha ka “motorcycle riding suspek” human misulay pagtabok sa check point sa Baloy, Brgy. Tablon ning syudad, kaganina sa kadlawon.
Giila ang mga nasikop nga sila Ronald Buntag, 33, habal-habal driver ug si Romel Tabobo, 35 anyos, pasahero pulos residente sa Purok 11 Baloy, Tablon CDOC
Sa pakighinabi sa Bombo Radyo kang Police Lt. Col. Alexy Sonido, hepe sa City Mobile Force Battalion, iyang gibutyag nga gi-isyuhan sa citation tickets ang duruha tungod sa nahimong “traffic violation”.
Sa pagbody search sa mga operatiba, ilang nadiskobrehan nga kini nagdala sa mga kontrabando.
Nakuha sa posisyon sa mga suspek ang kalibre 45, usa ka magazine sa cal.45 nga dunay unom ka buhing bala, tolo ka pakete sa shabu, usa ka pakete sa Marijuana, usa ka swiss knife, tolo ka cellphone ug cash nga nagbalor sa kapin P2,000.
Patung-patong nga kaso ang atubangon sa mga suspek sa piskalya ugmang adlawa.
