CAGAYAN DE ORO CITY – Gitudlo sa kapolisan nga ‘crime of passion’ ang giingong rason kon nganong gipapatay ang Mr. Cagayan de Oro candidate nga biktima sa 13th Street,Brgy Nazareth ning syudad sa miaging Mayo 9 ning tuiga.
Kini human naduso na sa kapolisan ang kasong murder batok sa dili mominus tulo ka akusado nga naglakip sa mastermind aron pusilon-patay ang biktima nga si Adrian Rovic Fornillos nga taga-Lapaz 2,Brgy Lapasan ning syudad.
Miingon si COCPO spokesperson Police Lt Col. Evan Viñas nga nadugay ang ilang pagduso sa kaso kay tuyo nila nga lig-on ang mga basehan nga magamit sa pagdungog niini sa korte.
Siya miingon nga hulaton nila ang hukom sa piskalya ug korte kabahin sa kaso alang sa pagkab-ot sa hustisya ngadto sa pamilya sa biktima.
Naigo ang ulo sa biktima samtang kini dul-it nga gipusil sa wala una panganli sa kapolisan nga mga suspek.
Hisayran nga una nang nanawagan ang pamilya sa biktima sa dinaliang hustisya ilabina nga dili sila kumbisido nga tungod sa pageant contest ang posibleng rason kabahin sa hitabo.
