CAGAYAN DE ORO CITY, Philippines – Hakot award si Si Krishnah Marie Gravidez sa Baguio City human siya ang gikoronahan isip Miss World Philippines 2024.
Si Gravidez maoy nag-una sa 32 ka mga kandidata sa coronation night nga gipahigayon sa Mall of Asia Arena karong Biyernes sa gabii.
Gawas sa maong titulo, nakadaug sab kinig Best in Evening Gown, Best in Swimsuit, Miss Skin ni Cathy Valencia, Miss Photogenic, Miss Hello Glow, Miss Procap ug Miss Dr. Leo awards.
Si Jasmine Omay sa Tarlac maoy mihupot sa Miss World Philippines 2024 1st Princess title; samtang si Sophia Bianca Santos sa Pampanga maoy Miss World Philippines 2024 2nd Princess.
Si Dia Maté sa Cavite maoy gikoronahan nga Miss Reina Hispanoamericana Filipinas 2024 samtang si Patricia Bianca Tapia sa Batangas maoy Miss Philippines Tourism 2024.
Si Nikki Buenafe nga taga-Probinsya sa Pangasinan maoy misakmit sa Miss Multinational Philippines 2024 title ug Jeanne Isabelle Bilasano sa Bicol Region ang Face of Beauty Philippines 2024.
Sila Billy Crawford, kauban si Universal Woman 2024 Maria Gigante, Teejay Marquez ug Reina Hispanoamericana Filipinas 2021 Emmanuelle Vera, maoy nag-host sa coronation night
Ang kasamtangang Miss World nga si Krystyna Pyszková sa Czechia maoy mihatag sa Rays of Hope crown ngadto kang Krishnah samtang si Miss World Philippines 2022/2023 Gwendolyne Fourniol mipasar sa sash.
