CAGAYAN DE ORO CITY- Ipai-ila sa 14 ka kandidata sa Ms Earth International ang tagsa-tagsa nila ka kaugalingon kuyog sa ilang kultura atubangan sa katawhan diha sa Centrio,Ayala Mall ning syudad unya sa hapon.
Kini isip kabahin sa ilang pre-pageant activities diin gibahin ang 40 ka kandidata pagbisita sa lain-laing bahin sa Pilipinas ilabina dinhi sa Mindanao.
Miingon si Ms Earth Philippines Air Ana Monica Tan nga sul-ubon nga bisti o sinina sa mga kandidata ang Filipino-made designs sa maong kalihukan.
Dugang ni Tan kinsa maoy mogiya usab sa mga kandidata nga sa pagka-ugma,mohimo’g mangrove tree planting sa Laguindingan ug mosuroy sa Initao-Libertad Seascape ug Landscape ang mga kandidata ayha mobalik sa kauluhan.
Motambong usab sa flag raising ning buntaga ang 14 ka kandidata kuyog si Ms Cagayan de Oro Cindy Obeñita kinsa empleyado sa kapitolyo-probinsyal ning buntaga.
Himoon ang Ms Earth 2019 coronation sa Cove Manila sa Oktubre 26 ning tuiga diin si Janelle Lazo Tee ang pambato sa Pilipinas.
