(Update) CAGAYAN DE ORO CITY – Naka-self quarantine na’g sugod si 2021 Ms Inter-continental Cindy Obeñita sa usa sa mga five star hotel sa Metro Cebu.
Kini nunot sa iyang paghiuli na’g balik sa Pilipinas gikan sa iyang malampuson nga pag-apil sa maong indigay sa Egypt sa miaging Biyernes sa kagabii.
Miingon ang garbo dinhi sa syudad ug lalawigan nga excited na kining ikahimamat ang mga tawo nga walay pagduda sa iyang abilidad ug kaalam.
Gipasabot niini nga lima lamang ka adlaw ang iyang self-quarantine isip pagsubay sa anti-COVID 19 protocols ug gilayon kining molupad pa-kauluhan diin naghulat ang grand homecoming sa Bb Pilipinas Organization.
Samtang wala pa mabutyag ni Cindy kon kanus-a kini tugtan makauli dinhi sa syudad diin naghulat usab ang iyang pamilya,kabanay,mga higala ug co-workers diha sa kapitolyo probinsyal.
Hisayrang igo ra gitugtan makauli si Cindy sa pila ka adlaw sa Ms Inter-continetal Organization sa Pilipinas ug paghuman niini mobalik ra usab kini sa Egypt aron pagtuman sa iyang tahas.
