CAGAYAN DE ORO CITY – Saksihan mismo ni Ms Universe Philippines Gazini Christiana Ganados ang pagsundayag sa 8th Mindanao Fashion Summit sa activity center sa Ayala Mall,Centro sa syudad sa Agosto 26 hangtod 28 ning tuiga.
Kini kabahin gihapon sa pagpabibo sa mga aktibidad nga nakahan-ay alang sa kapistahan sa patron sa syudad nga si Sr San Agustin sa Agosto 28 ning tuiga.
Gawas kang Gazini,mopadugang sa kabibo usab ang paghidangat ni Ms World Philippines 2018 Katrina Rodriguez alayon sa maong kalihukan.
Dili lamang maka-sentro kanila kang Ganados ug Rodriguez ang maong kalihukan kay saksihan usab ni actor-model Kit Thompson ang fashion summit nga mugna sa fashion designers nga gikan gyud sa Mindanao.
Nasayran nga ang ika-walo nga Mindanao Fashion Summit ang usa sa daghang ‘core events’ nga gipasiugdahan sa Higalaay Festival 2019 promotion committee nga gipanguluhan ni Eileen San Juan nga ubos sa pag-uyon usab ni City Mayor Oscar Moreno.
