Tinguha ni Monsignor Eutiquiano “Tex” Legitimas, Co-Founder sa House of Hope Foundation Inc. (HOHFI), nga mabalik kaniya ang pagdumala sa House of Hope nga nahimutang sa Barangay Lumbia, Cagayan de Oro City.
Gihimo ni Legitimas ang pamahayag human kini nadismaya sa pamaagi sa pagdawat sa mga pasyente nga gustong musulod sa pasilidad. Usa sa iyang gihimong pananglitan ang iyang kaugalingon nga gibalibaran ug wala dawata kay mando kono sa tagdumala.
Naila ang House of Hope isip usa sa labing karaan nga custodial psychiatric care facility nga gitukod niadtong tuig 1997, aron tabangan ang mga mentally challenged nga pasyente.
Sukad sa tuig 2023, ang JR Borja General Hospital (JRBGH) sa syudad, ang nagdumala sa operasyon sa pasilidad subay sa Memorandum of Agreement nga gipirmahan tali sa lokal nga kagamhanan ug sa House of Hope Foundation.
Apan, si Msgr. Legitimas nagpahayag sa iyang kabalaka tungod sa kakulang sa pondo ug sa “delay” sa paghatag sa annual financial assistance nga P3 milyon nga gisaad sa Cagayan de Oro – Local Government Unit (CDO-LGU) alang sa apostolic ug missionary duties sa House of Hope.
Gilauman ni Msgr. Legitimas nga pinaagi sa maayong kolaborasyon sa lokal nga kagamhanan, mabalik ang iyang papel sa pagdumala sa pasilidad aron mas mapalambo ang serbisyo ug pag-atiman sa mga pasyente, ilabina sa aspeto sa community reintegration ug after-care program.
