Mibati sa tumang kabalaka si Msgr Rey Monsanto, Consultor sa Archdiocese sa Cagayan de Oro, dihang milabay ang daghang oras nga wala niya makontak ang iyang mga igsoon ug paryente sa munisipalidad sa Catmon, probinsya sa Cebu.
Mahinumduman nga kini nga lugar maoy gitumbok nga agian sa mata sa bagyong Tino.
Miingon si Monsanto nga tungod sa pagkapalong sa sugang dagitab wala nakapanawag ang iyang mga paryente. Hinoon, luwas tanan ang iyang kadugo kay wala man miigo ang grabeng kusog nga ulan sa ilang dapit.
Gawas niini, iya usab gipangumusta si Most Rev. Alberto “Abet” Uy, ang bag-ong arsobispo sa Cebu, ug namahayag nga luwas ra kini kay nakabakwit sila dihang nadungog ang balita nga episentro sa bagyo ang ilang lugar.
Gireport ni Bishop Abet nga 98 na ang patay sa ilang lugar ug gatus pa ang missing.
Sa pagkakaron, milaraw ang mga ka simbahanan sa Cagayan de Oro nga magpadala subli sa mga hinabang padulong sa Cebu, sama niadtong nagpadala silag hinabang sa mga biktima sa linog sa Bogo City.
