CAGAYAN DE ORO CITY – Gitunulan ni Sen Migz Zubiri ang Northern Mindanao ug Caraga Regions sa kapin 2-mil ka China-made antibody diagnostic kits.
Miingon si Northern Mindanao Medical Center Hospital Director Dr Jose Chan nga gawas kanila,nahatagan usab sa multi-million pesos nga balor sa testing kits ang JR Borja Memorial General Hospital,Bukidnon Provincial Medical Center sa Malaybalay, Caraga Regional Hospital sa Surigao City, Surigao del Norte ug Cotabato Regional and Medical Center ug Bangsamoro Region sa Muslim Mindanao.
Gimugna ang maong kits pinaagi sa kompaniya nga Xiamen Boson Biotech Company Limited diin nakabase sa Fujian, China.
Samtang gipahimangnuan ni Dr. Ian Gonzales, Infectious Diseases cluster head – Department of Health 10 ang katawhan kalabot na sa mga diagnostic rapid test kits sa coronavirus disease COVID-19 nga mapalit online sama sa ‘facebook.’
Siya miingon nga bisan aprubado sa Food and Drug Administration ang usa ka ‘rapid test kits’ nga baligya sa online, apan dili kini pwede himoon nga ‘personal o home use.’
Gikinahanglan nga doktor o health worker ang mo-administer sa test, mo-interpret sa result ug himoon kini sulod sa insakto nga pasilidad.
