Giklaro ni Dir. Gerry Caño, sa Cagayan de Oro Water District (COWD), nga luwas ug limpyo ang water supply nga gikan sa ilang buhatan ug walay angay kabalak-an ang mga konsumante.
Matod pa ni Caño, kompleto ang COWD sa mga ekipo ug kanunay nilang ginapailalom sa laboratory test ang ilang tubig, subay sa Philippine National Standards for Drinking Water.
Iyang gipasalig nga matinud-anon ang buhatan sa pagserbisyo ug sa paghatag ug limpyo ug luwas nga tubig alang sa publiko.
Gipasabot usab ni Caño nga ang mahitabo lang ang paglubog sa tubig kung adunay kusog nga ulan o baha, natural lamang nga proseso sa flushing mechanism aron ipagawas ang mga particles sa linya sa tubig.
“Siguro nga adunay panahon nga lubog ang tubig, ug dili maayo ang dagway sa tubig sa ilahang na-obserbahan, basin kana nga mga panahon, Bombo Junel, ang atong tubig gikan sa Water District, nagpahigayon sa gitawag nato’g flushing”, ingon ni BOD Caño.
Dugang pa sa opisyal nga luwas gihapon kini gamiton kay napamatud-an nga negatibo sa kontaminasyon base sa mga gipahigayon nga water testing.
Hisayran nga nakadawat og mga reklamo ang COWD tungod sa mga kaso sa stomach-related illnesses sa syudad, apan base sa imbestigasyon, dili gikan sa COWD ang nakontamina nga tubig, kondili sa usa ka establisemento nga nagpositibo ang water reservoir sa kontaminasyon.
Contributor: James Oliver, interviewed via BOMBO HANAY BIGTIME
