CAGAYAN DE ORO CITY-Nasikop sa search operation sa PDEA-10 ang aktibong municipal councilor sa Zone 3,Brgy Mantangale,Balingoan,Misamis Oriental kaganihang kadlawon.
Giila ni PDEA agent Ben Calibre ang suspek nga si Roel Padillo nga nagpuyo sa maong lungsod.
Miingon si Calibre nga wala sa listahan ni Pres Rodrigo Duterte si Padillo apan lig-on ang mga ebedensiya nga nakuha nila nga aktibo kining tigpayuhot sa gidiling droga.
Nakompiskar gikan sa suspek ang 14 ka suspected sachet sa shabu sulod sa balay niini.Bana-bana nga may gimbug-aton nga 30 gramos ang nakompiskar diin may estimated market value nga 150-mil pesos.
Nalangan pagsulod ang mga operatiba sa PDEA kay dugay nangabli si Padillo sa ilang balay.
Samtang gipanghimara-ot sa suspek nga si Padillo ang linu-og nga binuhatan sa PDEA-10 batok kaniya.
Kini human gihimakak ni Padillo nga namaligya siya’g shabu sa katawhan sa maong lungsod.Miingon si Padillo nga mga karneng baboy ang iyang gamay negosyo ug dili shabu.
Namahayag usab ang suspek nga itugyan na lamang niini sa kahitas-an ang mahimong ‘gaba’ ngadto sa mga otoridad nga nagbutang ug mga shabu sulod sa ilang pinuy-anan kaganihang kadlawon.
