CAGAYAN DE ORO CITY – Kamulo nga gi-determinar sa mga piskal ang basehan sa kasong pagpanglugos nga gipasaka sa pamilya sa menor de edad batok sa aktibong mayor sa lungsod sa Bukidnon.
Kini ang gikompirmar ni Bukidnon Police Provincial Police Office Director Col. Jovit Culaway atubangan sa prensa nga mitambong sa Kapihan sa Bagong Pilipinas sa Camp Alagar ning syudad kaganihang buntag.
Nabulgar ang kalambigitan sa maong wala una hinganli nga municipal mayor kay apil kini sa gipangutana sa prensa ngadto kang Police Regional Office 10 Director Brig Gen Ricardo Layug Jr.
Giangkon ni Layug nga kompirmado ang impormasyon apan gitahasan niya si Culaway nga tutukan ang maong kaso ilabina nga menor de edad ang nagsilbing biktima sa giingong pagpanglugos sa mayor.
Nailhan na ang maong mayor apan aron proteksyon sa dungog sa biktima,gilikayan nga mahisgutan ang partikular nga lungsod diin nanimuyo ang magkabanging panig.
