CAGAYAN DE ORO CITY-Gibasura sa korte ang kasong murder nga giatubang ni kanhi Sr/Insp Charles Ludweg Espera ug Insp Arnel Gighe ning syudad.
Kini human mapakyas makatambong ang prosekyutor nga gitahasan sa gobierno aron itaral ang mga akusado sa giatubang nila nga kasong pagpatay kang Maria Erika Yabut ug pagka-angol sa kaipon niini nga si Jimboy Jamaca.
Gibutyag ni Regional Trial Court Branch 23 Presiding Judge Vincent Rosales nga gipaboran niini ang mosyon sa mga akusado ibasura ang kaso tungod sa wala pagtunga ni trial Prosecutor Hjalmar Quintana Jr sa gi-schedule unta nga court hearings.
Sila si Gighe ug Espera ang giakusahan sa testigo nga si Jamaca nga maoy mipusil kanila ni Maria Yabut samtang gidala sa Brgy F.S Catanico ning syudad niadtong Disyembre 11,2014 apan kusganon nila gihimakak ang pasangil.
Samtang dismayado ang pamilya ni retired SPO4 Rolando Jamaca nga nabasura ang kasong murder nga giatubang sa duha ka kanhi police officials sa korte ning syudad.
Miingon si Jamaca nga lig-on ang ebedensiya nga napresentar nila sa korte apan nabasura lamang gihapon ang kaso.
Dugang ni Jamaca nga naglaum sila nga mahatagan sa pabor ang dinalian nga motion for reconsideration nga giduso sa prosecutor kang Rosales nga naghawid sa kaso.
Si Jamaca ang amahan sa gipatay usab nga sila si Roland ug Harold Jamaca diin mga akusado sila si PO2 Manuel Quipanes ug PO1 Jun Riel Barrientos sa Brgy Mambuaya sa syudad tuig 2014.
