CAGAYAN DE ORO CITY – Hayan maduso na ang kasong murder sa piskalya ning adlawa batok sa suspek nga nagpusil-patay sa traffic enforcer diha sa bisinidad sa merkado Cogon sa syudad.Kini human naila na ang maong suspek nga mihimo pagpusil-patay sa biktima nga si RTA Cogon team leader Cris Cabingas niadtong Disyembre 30, 2016.
Miingon si City Police Director Sr Supt Ronnie Francis Cariaga nga positibong gitudlo sa ilang tulo ka testigo ang suspek nga mipusil-patay kang Cabingas gamit ang kalibre 45 nga armas.Samtang maisugon nga gipadayag sa gatusang sakop sa RTA ang ilang kasuko ug pagkondenar batok sa utok sa mipusil-patay sa ilang kauban nga si Cabingas pinaagi sa solidarity march palibot sa syuidad kagahapon sa buntag.
Miingon si Task Force Hapsay Dalan overseer Atty Egay Uy nga nakab-ot nila ang katuyuan sa maong martsa diin naglakip sa pagkondenar sa kamatayon ni Cabingas,paghiusa batok sa mga batikos kanila ug ang paghatag tin-aw nga dili angay ibasol sa traffic enforcers ang suliran sa trapiko sa syudad.Una kining nahitabo sa kasaysayan sa syudad
nga mibiya sa ilang mga trabaho ang RTA personnel aron molusad sa martsa gumikan sa nahitabo kang Cabingas.Gani,katugpahan na sa gamay’ng abyon ang duluna palibot sa merkado Cogon ning syudad.
Kini ang gihimo nga paghulagway ni Uy human gilusad ang clearing operation ngadto sa illegal market vendors palibot sa merkado Cogon sa syudad kagahapong adlawa.Miingon si Uy nga walay laing katuyuan ang clearing operation gawas sa hingpit pagsunod sa nalatid sa city traffic code.
Kuyog sa kalihukan sa grupo ni Uy ang mga personahe sa RTA ingon man ang kapolisan sa dakbayan.
