CAGAYAN DE ORO CITY – Nakasuhan na sa murder ang aktibong pulis nga namusil-patay sa police asset piskalya ning syudad kagahapong adlawa.
Kini human paspas nahuptan sa mga operatiba sa Cogon Police Station ang maong pulis nga gitumbok sa mga testigo ug sa CCTV cameras nga maoy mipusil-patay sa biktima nga si Henry Pimentel,43 anyos,dunay kaipon nga taga-Brgy Macasandig sa syudad.
Gibutyag ni Major Sabino Labitad,hepe sa Cogon Police Station nga naghulat na lang sila sa commitment order gikan sa korte sa higayon nga adunay probable cause nga makit-an ang prosecutors nga mosusi sa ilang napasaka nga kaso.
Kasamtangang detinado sa Maharlika Detentio Cell ang maong pulis nga temporaryong gidis-armahan tungod sa pasangil batok kaniya.
Gitumbok ni Labitad nga hayan away kabahin sa illegal nga droga ug panagdumot ang motibo sa kremin sa miaging Lunes sa kadlawon.
Una usab niini,nagdumili paghatag sa komento sa media ang maong pulis apan nangayo kini’g pasaylo ngadto sa kabanay sa iyang napatay nga police asset.
