Padayon ang assessment ug monitoring sa City Disaster Risk Reduction and Management Department (CDRRMD) sa Cagayan de Oro sa mga landslide-prone nga lugar, human gikompirma sa opisina ang usa ka makasubo nga insidente nga nakapawala og upat ka kinabuhi sa Brgy. Agusan tungod sa Bagyong Basyang.
Sumala kang Nick Jabagat, hepe sa CDRRMD, ang landslide nga natabo sa Gabule Compound, Sambulawan nahitabo sa wala damhang oras samtang nangatulog ang pamilya, ug kalit lamang mibigay ang yuta nga diretsong mitabon sa ilang panimalay.
Gipahayag sa opisyal nga upat ka miyembro sa pamilyang Lariosa ang nabawian og kinabuhi, lakip ang 11-ka-bulan nga sanggol nga si Yasmeen ug 12-anyos nga si Yami, uban ang duha ka hamtong nga sila Paul ug Ruffa Lariosa.
Samtang duha ka menor de edad, nga naila nga sila Andi ug Bril, ang nasamdan ug gilayon nga gidala sa ospital alang sa medikal nga pag-atiman.
Matod pa ni Jabagat, una kini nga natala nga landslide incident sa Brgy. Agusan, hinungdan nga gihimo kini nga dakong leksyon sa local government ug sa komunidad bahin sa kahimtangan sa yuta ilabi na sa panahon sa padayon nga ulan.
Gidugang pa sa CDRRMD nga mas hugot na karon ang monitoring ug hazard assessment, ilabi na sa mga lugar nga kanunay nga bahaon ug posibleng landslide, samtang gihangyo ang katawhan nga magmatngon, motuman sa mga pahimangno, ug mag-report dayon kung makamatikod og timailhan sa peligro. (james oliver)
