CAGAYAN DE ORO CITY- Gidawat ni last termer City Councilor Atty Nadya Emano-Elipe ang tahas nga modagan pagka-bise mayor kontra kang incumbent City Vice Mayor Rainer Kikang Uy sa Mayo 13 nga piliay sa syudad.
Kini human nahukman sa ilang pamilya ug partido nga siya ang mohulip sa posisyon sa iyang namatay’ng amahan nga si kanhi City Mayor Vicente ‘Dongkoy’ Emano.
Namahayag si Nadya nga dili niya mahulipan ang abilidad ug daghang nahimo sa iyang amahan apan buhaton usab niini ang mga butang nga haom sa naangkong nga abilidad.
Si Dongkoy namatay sa edad nga 76 tungod sa sakit nga pnuemunia samtang gitabang sa mga doktor sa pribadong ospital sa syudad niadtong Mayo 7 ning tuiga.
Una niini,emosyonal si Nadya kuyog sa iyang pamilya nga misaysay atubangan sa political supporters nga dili una unta kini mosulod sa politika kay nasabutan nila ni Misamis Oriental Board Member President Elipe nga atimanon ang ilang mga anak.
Si Dongkoy ang giila nga ‘political kingpin’ sa syudad ug lalawigan tungod sa kaugalingong istilo niini sa iyang politika diin daghang kanhi ug incumbent elected officials ang nagtahod kaniya.
