CAGAYAN DE ORO CITY – Gimanduan sa kadagkuan sa Local Water Utilities Administration o LWUA si Engr Edna Najeal nga ihunong na ang pagsapaw sa trabaho sa gibutang nila nga interim officials nga midumala sa Cagayan de Oro Water District o COWD ning syudad.
Kini human naglugwa si LWUA administrator Atty. Moises Salonga sa CEASE and DESIST order batok sa mga kalihukan ni Najeal isip acting regular COWD general manager.
Una nang wala ilha sa LWUA ang gihimong katudluan sa set aside COWD board of directors sa pagsilbing general manager ni Najeal kay gilugwayan nila sa unom ka bulan si interim General Manager Fermin Jarales.
Apan tubag ni Najeal nga isalig na lang niya sa iyang abogado ang maong isyu kay ipadayon niini ang pagtrabaho sulod sa maong ahensya.
Samtang kampante nga anaa sa ensakto ang dugang unom ka bulan nga katudluan ni interim COWD General Manager Fermin Jarales.
Kini bisan pabiling wala ilha sa set aside board of directors ug pipila ka COWD officials ang iyang presensiya nga modumala sa sistemang panubig sa dakbayan.
Miingon si Jarales nga unta tahuron na lang sa set aside COWD board of directors ang sugo ni Pres Bongbong Marcos pinaagi sa LWUA aron mas mapaspasan ang pagsulbad sa daghang suliran sa panubig sa syudad.
Si Jarales ang makapila nang gisalikway sa mayoriya nga mga opisyal sa syudad apan pabiling gisaligan usab kini sa national govt.
