CAGAYAN DE ORO CITY – Gipusil-patay sa wala mailang armadong mga suspek ang naka-floating status nga police officer mismo tiilan sa Camp Alagar diin nakabase ang Police Regional Office 10 sa Claro Recto Avenue sa syudad.
Giila ang biktima nga si Patrolman Rolly Pat Aguas,hingkod ang edad,minyo,taga-Misamis Occidental ug kasamtangang nag-abang sa Brgy Lapasan sa dakbayan.
Gibutyag ni Chief Master Sgt Ronnie Donasco,case investigator sa Agora Police Station nga anaa sa duha ngadto tulo ka suspek nga sakay sa motorsiklo ang dul-it mipusil gamit ang kalibre nga armas sa ulo ni Aguas hinungdan sa kamatayon niya.
Samtang gitahasan ni Police Regional Office 10 Director Brig Gen Rolando Anduyan ang Cagayan de Oro City Police Office nga ipadali ang pagsulbad sa kamatayon sa ilang kaubang pulis nga gipusil ning syudad.
Gibutyag ni COCPO Director Col Henry Dampal nga pundok sa hanas nga gun-for-hire ang mipusil kang Aguas tungod sa kakursanada bisan nga anaa sa bisinidad sa ilang regional office.
Nanganti si Dampal nga tumbukon sa pinakadali nga panahon ang motibo sa kremin ug kinsa ang utok sa pagpatay kang Aguas.
