CAGAYAN DE ORO CITY – Ipasaka karong adlawa sa PDEA-Misamis Oriental ang kasong pagsupak sa Dangerouns Drugs Act of 2002 batok sa aktibo apan naka-floating nga pulis kuyog ang laing sibilyan nga empleyado sa city hall sa dakbayan sa Gingoog,Misamis Oriental.
Miingon si PDEA-MisOr Provincial Director Expedito Cardona Jr nga nadakpan sila Police Staff Sgt Kenneth Lofranco pinaagi sa anti-drug buy bust operation mismo sa pinuy-anan sa iyang kauban nga city veterinary office employee nga si Divina de Lima nga pulos nagpuyo sa Purok 1,Brgy 24 sa maong syudad.
Nakompiskar gikan sa posisyon sa mga dinakpan ang 10 gramos nga gitoohang shabu ug armas ni Lofranco.
Miingon si Cardona nga may pag-angkon si Lofranco nga dakong kasaypanan ang iyang nahimo nga paggamit ug pagbaligya sa ilegal nga droga.
Dugtong niini,gikasuko ni Police Regional Offfice 10 Director Brigadier General Lawrence Coop ang giingong kalambigitan sa ilang usa ka pulis sa illegal drug trade sa Gingoog City.
Gibutyag ni Navarro nga gikondenar sa ilang kadagkuan ang binuhatan ni Lofranco nga nakahatag sa negatibong epekto sa ilang organisasyon.
Gikompirmar ni Navarro nga under investigation usab si Lofranco sa pasangil sa ilegal drug activities rason nga naka-floating kini ug gibutang sa Regional Police Holding and Accounting Office o RPHAO nga nakabase sa Camp Alagar ning syudad.
