CAGAYAN DE ORO CITY – Mapun-an ang atubangong kasong kriminal sa suspected high value individual o HVI nunot sa subli pagkasikop niini sa kapolisan sa buy bust operation sa Purok 12, Baloy,Barangay Tablon ning syudad.
Gitumbok ni Police Regional Office 10 Director Brig Gen Ricardo Layug ang dinakpa nga usa ka 45 anyos nga si alyas Boy Gahi nga nabawian sa ilang lower unit operatives sa 60 gramos sa gitoohang shabu nga nagkantidad 408-mil pesos.
Siya miingon nga kanhi na nag-atubang sa kasong pagsupak sa Dangerous Drugs Act of 2002 si Boy Gahi apan temporaryo nakagawas kay mipahimulos sa plea bargaining agreement sa korte.
Gawas sa suspected shabu nga nakompiskar gikan sa suspek,narekober usab sa tropa ang P500 marked money, cellphone ug ubang mga ebedensiya.
Detinado una ang suspek sa Maharlika Detention Cell ubos sa pagdumala sa Cagayan de Oro City Police Office samtang gihan-ay na ang dugang kasong pagsupak sa Dangerous Drugs Act of 2002 sa piskalya sunod semana.
