Namalandong sa Malasag mikunhod

Nakasinati og nipis nga presensya sa mga katawhan ug deboto ang sikat nga pilgrimage site sa Malasag Shrine, Barangay Cugman, kagahapon tungod sa kainit sa panahon. Sumala ni Cugman Police Station Commander PMAJ Jason Felisilda, kapin 571 ra ka deboto ang narehistro nga miadto sa maong site, mas gamay kumpara sa kadaghanan sa deboto nga nanaad sa miaging tuig sa Huwebes Santo.Butyag ni Felisilda nga usa sa mga hinungdan mao ang sobra nga kainit sa panahon, lakip na ang pagtaas sa presyo sa petrolyo ug palaliton karong panahona. Bisan pa niini, gilauman gihapon sa kapulisan ang pagdagsa sa daghang Katoliko nga manaad karong Biyernes Santo hangtod sa pagtapos sa Semana Santa.Sa laing bahin, alerto usab ang kapulisan nga nag‑monitor sa maong lugar aron masiguro ang kaluwasan sa mga deboto. Nakatala na sila og duha ka kaso sa pagkalipong ug gipanghangak nga mga deboto, apan pasalig sa kapulisan nga inubanan sa mga nakaantabay nga medic, andam sila sa pag‑atiman sa dili malikayang panghitabo sa kalihokan. (JAMES OLIVER)