CAGAYAN DE ORO CITY – Gitumbok sa local health experts nga atake sa kasingkasing ang hinungdan kon nganong namatay ang 73 anyos nga si Zoilo Joaquin Borcillo pipila ka minutos gikan sa pagdawat niini sa Astrazeneca vaccine ning syudad.
Kini ang giklaro ni City Mayor Oscar Moreno samtang gihulat pa ang pinal nga resulta sa imbestigasyon kon unsa nga health factor ang naka-trigger sa kamatayon ni Borcillo nga residente sa Brgy Agusan ning syudad.
Apan subli gipasalig ni Moreno nga ipadayon ang vaccination rollout sa senior citizens sa syudad sunod semana.
Samtang gi-awhag ang mga opisyal sa Brgy Agusan ngadto sa mga senior citizen nga magpabakuna sa gihapon bisan kon dunay isolated case nga namatay ang usa sa ilang residente kay na-heart attack sa miaging adlaw.
Gibutyag ni Agusan Brgy Kapitan Andrew Meliza nga naglaum sila nga dili mahadlok ang ilang mga senior nga magpabakuna taliwala sa pagkamatay sa 73-anyos nga lolo human madapatan sa Astrazeneca vaccine.
Saysay ni Meliza nga lakip man gani sila ang nagpabakuna batok COVID-19.
Sa pikas baihn,nakahukom na ang pipila ka senior citizen nga dili na lamang magpabakuna batok COVID-19 sa syuda.
Kini taliwala nga prayoridad sila sa gobyerno nga madapatan sa bakuna.
Gibutyag ni Jocelyn Hernani, Brgy Bugo Senior Citizen President nga gusto sa ilang kaubanan nga ihatag na lamang sa uban ang bakuna nga alang kanila gumikan kay andam na sila modawat kon hangtud kanus-a na lamang sila ning kalibutana.
Una nang nabutyag ni Moreno nga dunay epekto ang pagkamatay sa senior citizen human natupuki sa bakuna sa miaging adlaw.
