(Update) CAGAYAN DE ORO CITY – Namatay na ang na-rescue sa militar nga sakop sa rebeldeng New People’s Army nga samaron sa natigayong engkuwentro sa bukirang bahin sa Gingoog City, Misamis Oriental.
Miingon si 58th IB commander Army Lt. Col. Christian Uy nga nasubo sila sa gidangatan ni Jerry Bilohan nga taga-Balingasag kay maoy tuyo nila nga luwason kini aron mabag-o ug ikakuyog pagbalik ang iyang kabanay diha sa lungsod sa Balingasag.
Miingon ang opisyal nga posibleng na-kontiminar sa pulbura sa bala nga miigo sa biktima ang lawas niini hinungdan sa iyang kamatayon.
Dugtong niini,gilayong gitugyan sa militar sa pamilya ang patay’ng lawas ni Bilohan aron mahatagan sa pormal nga haya ayha matunob sa katapusang pahulayan sa maong lungsod.
Gibutyag usab ni Uy nga ang 22 anyos nga si Bilohan ang pito ka bulan pa lang nga aktibo sa kalihukan.
Si Bilohan ang ikaduhang NPA member nga namatay sukad na-engkuwentro’g balik sa militar ang maong grupo sa bukirang bahin sa Gingoog sa miaging Oktubre ning tuiga.
