Misupak ang National Citizens’ Movement for Free Elections (NAMFREL) Cagayan de Oro–Misamis Oriental sa mga sugyot nga i-postpone ang Barangay ug Sangguniang Kabataan Elections (BSKE) karong Nobyembre 2026 tungod sa kasamtangang krisis.
Mipadayag si Nestor Banuag Jr. nga mas angay padayonon ang regular nga eleksyon aron mahatagan og kahigayonan ang katawhan sa pagpili ug pag-ilis sa ilang mga lider ug mapadayon ang demokratikong proseso sa lokal nga pagpangulo.
Matod pa niya, ang pagpadayon sa gikatakda nga eleksyon makatabang sa pag-refresh sa liderato ug makapugos sa mga opisyales nga magpakita sa tinuod nga serbisyo ug responsibilidad ngadto sa ilang mga komunidad.
Dugang pa niya, ang paglangan sa eleksyon mahimong makaapekto lamang sa operasyon sa lokal nga gobyerno ug sa dali nga pagresponde sa mga problema sa barangay nga nagkinahanglan og aksyon.
Tungod niini, gi-awhag sa NAMFREL nga timbangon pag-ayo ang desisyon ug siguruhon nga ang interes sa katawhan ug demokratikong proseso ang mapabilin pinaagi sa padayon nga pagpahigayon sa eleksyon.
