CAGAYAN DE ORO CITY – Mopalig-on pa sa ilang pagbantay ang National Citizens’ Movement for Free Elections (NAMFREL) Misamis Oriental-Cagayan de Oro Chapter sa dagan sa 2025 elections.
Kini human kompirmaha ni NAMFREL MisOr-CdeO chapter coordinator Nestor Banuag Jr nga sudlan na nila ang online platform pinaagi play store aron mas mapadali ang pagbantay sa hapsay nga dagan sa proseso sa eleksyon ning tuiga.
Siya miingon nga target nila magbaton sa 500 ka volunteers nga ikatag dili lang sa syudad ug lalawigan apan apil sa Camiguin Island.
Nagtoo pa gihapon ang grupo nga sa ensaktong edukasyon ug pagpasabot sa publiko,adunay mga botante pa gihapon ang mobotar subay sa ilang konsensiya ug dili masilaw sa kuwarta.
Hisayrang dugay nang isyu ang naghinobrang ‘vote buying’ nga hinimuan sa halos tanang mga kandidato ug daghang mga botante matag-lusad sa piliay sa nasud.
