CAGAYAN DE ORO CITY, Philippines – Kulatado sa mga miresponde nga ‘taong bayan’ ang usa ka notoryos nga kawatan, kinsa nisulay pagsukol dihang gisignit sa lechong baboy sulod sa ref sa usa ka panimalay sa Brgy Bugo, ning syudad, karong hapon
Giila ni Brgy. Bugo Kagawad Chebong Guevara ang suspek nga si alyas nga Boy Generalao, hingkod ang edad ug residente sa Tagoloan Misamis Oriental.
Subay sa inisyal nga imbestigasyon sa mga tanod, iladong akyat bahay o kawatan ang suspek sa managlahing zona sa barangay.
Gawas niini, nagbaton kono sa ‘dagon’ o ‘anting-anting’ ang gibana-bana 30 anyos nga suspek busa naabtan pa sa dul-an usa ka oras ang paglakag kaniya sa kapin kun kulang 50 ka tawo, gikan Zone 2 Greymar padulong sa Kalye Apeke, Zone 6 sa susamang barangay.
Nasaksihan pa sa mga tanod ang paglahos kono sa lawas sa suspek sa pader ug pag-upok sa tubig nga kapin 10 minutos.
Hinoon, wala ka-antos ang suspek gikan sa iyang pag-upok sa tubig sa suba sa Zone-6, busa, malampuson kining nadakpan sa mga ‘taong bayan’ ug sa mga barangay tanod.
Gi-awhag ni Kagawad Guevara ang mga nabiktima sa suspek nga muduol sa ilang barangay hall aron mapasaka sa Police Station 6 ang tanan reklamo.
