CAGAYAN DE ORO CITY, Philippines – Paslak na sa prisohan ang suspek nga mi-unay paglugos sa iyang 16 anyos nga babayeng bayaw didto sa Barangay 22-A Gingoog City, Misamis Oriental.
Giila ang suspek nga si alyas Jerson, 30 anyos, kolektor sa usa ka lending company ug residente sa maong lugar.
Nag-atubang ang suspek sa duha ka ihap sa kasong paglapas sa Rape relation to R.A. 7610.
Walay piyansa nga girekomendar ang korte alang sa temporaryong kagawasan sa suspek
Nahimong “Most Wanted” sa Regional Level ang suspek dihang nagtagu-tago kini human sa krimen niadtong Abril, 2024.
Nasikop ang suspek pinaagi sa Tracker team sa Gingoog City Police Station ug sa mga personahe sa CIDG Misamis Oriental PFU.
Unang namahayag ang 16-anyos nga biktima, nga giatake siya sa suspek sa duha ka managlahing higayon karong tuiga.
Ang mga insidente nahitabo samtang ang biktima didto sa pinuy-anan sa akusado nga nag-atiman sa iyang pag-umangkon.
Ang suspek gikustodiya na sa Gingoog CPS alang sa tukmang disposisyon.
