CAGAYAN DE ORO CITY – Dili hikawan sa Simbahang Katolika sa kapasayluan ang babaye nga video blogger nga gitudlong nangluwa sa butangana’g bendita sa entradang bahin sa San Juan Bautista Church sa lungsod sa Jimenez,Misamis Occidental.
Kini sa kondisyon nga makit-an sa Archdiocese of Ozamiz ubos sa pamunuan ni Archbishop Martin Jumoad,D.D nga kinasingkasing nang nagbasol si Christine Medalla sa iyang nahimo nga pagpasipala sa pagka-balaan sa simbahan.
Matud ni Jumoad nga nag-unang tuyo sa simbahan ang pagluwas sa mga kalag sa katawhan o ‘salus animarum’ sa sinultihang Latin rason nga dili nila ihikaw ang higayon mopasaylo sa vlogger kung tinud-anay naghinulsol na sa maong binuhatan.
Dumduman nga napugos ang arsobispo pagsira sa simbahan gumikan sa maong pagdagmal sa pagka-sagrado niini diin mitandog sa lig-ong pagtoo sa Kristiyanismong-Katoliko sa probinsya.
Hisayrang una nang gisulti ni Medalla nga nakigkita kini kang Reverend Father Rolly Lagada,kura paroko sa San Juan Bautista Church aron mopasabot sa mikatag nga video content sa social media.
Nangayo usab siya sa pasaylo apan wala pa’y hukom kay gihulat ang resulta sa panagtagbo sa board of consultors sa arkidiyosisis kabahin sa isyu.
Hisayrang namugos kini nga niya buhata ang pagpangluwa sukwahi sa giakusar batok kaniya sa netizens.
