Gisugdan na sa National Police Commission kun NAPOLCOM Region 10 ang ilang pagbantay sa imbestigasyon bahin sa managlahing kaso sa pagpanglugos ug sexual harassment nga gikalambigitan sa mga sakop sa kapolisan sa Amihanang Mindanao.
Sumala ni NAPOLCOM Region 10 Legal Officer Atty. Robert Lou Elango, nagtudlo na sila og abogado nga maoy motan-aw sa dagan sa mga kaso aron masiguro nga patas ug walay pabor-pabor ang imbestigasyon sa PNP.
Kini nga mga insidente naglakip sa sexual harassment batok sa mga police interns sa police station sa Bulua, Cagayan de Oro, ang pagpanglugos sa duha ka police trainees batok sa ilang kaubang trainee sa Jasaan, ug ang kasong pagpanamastamas nga giatubang sa usa ka police staff sergeant sa Villanueva, Misamis Oriental.
Hisayrang nakig-alayon na si Regional Director Atty. Ramon Alfredo De La Cruz sa kapolisan para sa case conference aron masiguro ang saktong pagpasaka og kasong criminal ug administratibo batok sa mga suspek.
Sa kasamtangan, gitabangan ug gina-atiman na sa NAPOLCOM ang mga biktima aron makahatag og sakto ug opisyal nga reklamo batok sa maong mga abusadong pulis.
