Gibisita ni National Police Commission (NAPOLCOM) Vice Chairman ug Executive Director Rafael Vicente Calinisan ang headquarters sa Police Regional Office -10 sa Kampo Alagar, Barangay Lapasan, ning syudad kagahapon.
Tumong niini nga masusi ang mga gambalay sa mga lower units sa kapulisan, human madawat ang report nga adunay mga nakapuga gikan sa holding cell usa sa police units sa Cagayan de Oro City Police Office (COCPO).
Gibisitahan ni Calinisan ang mga dagkung police station sa managlahing munisipalidad ug adunay pipila nga iyang gidayeg ang kalidad ug kadak-on sa ilang istasyon, lakip na ang ilang mini-cell.
Dugtong niini, gitin-aw ni Calinisan ang report nga nagsaka ang ihap sa mga police scalawags. Miingon ang opisyal nga 90% sa mga kasong gipasaka sa ilang mga personnel nadismiss kay kini harassment cases lamang, ug anaa sa 10% ang tinood nga ihap sa mga pulis nga nasipa sa serbisyon tungod kay napamatud-an nga sila nakahimo’g krimen gawas sa napasakang kasong administratibo.
