CAGAYAN DE ORO CITY-Masaligon ang 4th ID Philippine Army nga daghang impormasyon ang ilang makuha kalabot na sa mga umaabot nga aktibidadis sa New People’s Army o NPA.
Kini nunot sa pagkadakpi sa laing miembro sa Headquarters Force NEO Compac sa North Central Mindanao Regional Committee human biya-e atol sa engkuwentro sa Sitio Ulayanon, Brgy. Kalabugao, Impasugong, Bukidnon.
Matud ni 4th ID spokesperson Lt Tere Ingente nga daghang rebelasyon ang gihimo sa mabdos nga suspek nga si Susan Cabusao Guaynon, 22 anyos diin iyang giangkon nga kabahin ang iyang bana sa pagpatay kang Impasug-ong Mayor Mario Okinlay tuig 2014.
Gitumbok usab nga sila ang utok sa brutal nga pag-ambush patay sa tulo ka sundalo sa Sitio Kaleb, Barangay Kibalabag, Malaybalay City, Bukidnon niadtong Pebrero 2017.
Si Guaynon ang nasamdan human kabahin nga nakig-engkuwentro sa militar sa Impasug-ong niadtong Abril 14, 2018.
Nagtoo si Ingente nga posibleng makaapekto sa gilutong peacetalks sa gobyerno tali na sa CPP NPA-NDF ang engkwentro nga natigayon sa Bukidnon.
Apan siya miingon nga ila na lamang gisalig kang Pres Rodrigo Duterte ang hukom kung ipadayon ang sinultihanay-pangkalinaw o dili.
Gipasalig ni Ingente nga kanunay silang nakaandam sa pagsunod sa tanang kamanduan sa punong ehekutibo.
Igo na lamang kini naglaum nga mahimong sensiro ang mga rebeldeng NPA sa pagpatuman sa ceasefire.
