CAGAYAN DE ORO CITY, Philippines – Gideklarar ni Presidente Ferdinand Marcos Jr., ang Lunes, Nobyembre 4 isip National Day of Mourning kon Adlaw sa Pagbangutan.
Ang Proclamation 728 sa presidente, nagmando sa tanan ahensya sa gobyerno nga ipa-ubos sa ‘half-mast’ ang bandila sa Pilipinas, sugod sa buntag hangtud sa pagsalop sa adlaw.
Gihimo sa Malakanyang ang deklarasyon alayon sa pagsaka sa ihap sa mga namatay tungod sa Severe Tropical Storm Kristine, nga milampurnas sa Bicol Region, Calabarzon, Cordillera Administrative Region (CAR) ug Northern Luzon sa milabay’ng semana.
Subay sa labing ulahing data sa National Disaster Risk Reduction and Management Council (NDRRMC) dul-an 150 ka tawo na ang nakalas dihang managsunod nga miigo sa Pilipinas ang Bagyong Kristine ug Super Typhoon Leon.
Gumikan niini, mi-apelar si Presidente Marcos sa pag-ampo alang sa mga mitaliwan, lakip na sa mga survivors sa kalamidad nga mapalig-on ang ilang pagsalig sa Kahitas-an, sa gobyerno ug sa ilang tagsa-tagsa ka mga pamilya.
Una niini, mi-angkon ang presidente nga kinahanglan palambuon pa sa Pilipinas ang pagpaningkamot sa Disaster Risk Reduction (DRR) aron mapaniguro nga dili namasubli ang nahitabo sa Bagyong Kristine.
Hisayran nga sukad milingkod pagka-presidente si Marcos, kini pa lang ang unang higayon nga nakahiagom sa grabeng pagsaka sa ihap sa patay gumikan sa naglabay nga kalamidad.
