Mibatig kabalaka ang mga traktor human nila nasaksihan ang pagkabangag sa dalan sa national highway sa Sitio Kipolot, Barangay Palacapao, Quezon, Bukidnon.
Dyutay nga nahunong ang mga biyahe tungod sa insidente.
Nanawagan ang mga nakasaksi sa DPWH sa paghatag assessment kung “sink hole” ba ang nahitabo sa maong dapit.
Miresponde na ang personnel gikan sa MPSO-MDRRMO, MEO, ug BFP aron magsugod sa assessment ug clearing operations.
Gihangyo ang mga motorista nga maglikay sa maong dapit samtang nagpadayon ang mga kalihokan sa paglimpyo ug pagsiguro sa kaluwasan sa dalan.
Ania ang advisory gikan sa DPWH-10
Gipahibalo sa publiko nga ang Bukidnon–Davao City Road nga naglangkob sa Overview, Palacapao, Quezon, temporaryong gisirado sa tanang sakyanan tungod sa pagkaluspad sa dalan niadtong Oktubre 18, 2025; ang kadaot sa dalan padayon pang gi-assess, ug alang sa kaluwasan sa tanan, gi-deklarar nga dili malabyan ang tanang linya.
Gihangyo ang mga motorista nga gamiton ang alternatibong ruta: alang sa mga gagmay nga sakyanan, gikan sa CDO paingon sa Tagum City, agi sa Jct Sayre Highway Poblacion Valencia City via Kapalong–Talaingod–Valencia Road; gikan sa Camp 1 Maramag paingon sa Davao City, agi sa Jct Bukidnon–Davao City Road padulong sa Cotabato Boundary–Carmen–Kabacan–Matalam–Kidapawan–Digos City; ug ang labing dili girekomenda nga ruta mao ang Jct Bukidnon–Davao City Road padulong sa Brgy. Puntian, Quezon, Bukidnon paingon sa Arakan via Katipunan o Kidapawan City.
Padayon ang assessment ug clearing operations, ug gibutang na ang mga traffic signage ug barriers aron giya sa mga motorista. Palihug sabta ang kahimtang ug hulat sa dugang nga update.
