Tinood nga patas-on nga suholan ug dili mga pa-raffle ug pasundayag sa National Teachers’ Month ang gihangyo karon sa Alliance of Concerned Teachers Northern Mindanao gikan sa panggamhanan.
Gipahayag sa ACT Northern Mindanao Coordinator nga si Roland Cruz nga imbes kalingawan ra ang ihatag, kinahanglang patas-an na ang suholan sa mga bag-ong magtutudlo ngadto sa 50 ka libo ka piso ug 36 ka libo ka piso alang sa Salary Grade 1 nga kawani.
Dugang pa sa opisyal, usa ka pagluib sa mga magtutudlo ang pagkuha sa 44.7-bilyon ka piso gikan sa pondo sa edukasyon aron lang ibalhin sa flood control ug confidential funds.
Tungod niini, nagkahiusa ang grupo sa pagduso og dugang nga mga klasroms ug gamit sa pagtuon aron matubag ang nagkagrabe nga krisis sa mga eskwelahan.-
