CAGAYAN DE ORO CITY – Manubag na’g sugod batok sa iyang mga giatubang nga pasangil nga kriminal ang gi-tratar sa estado nga ‘national most wanted person’ nga nadakpan sa hiniusang operasyon sa kapolisan sa Brgy Bacolod Chico,Marawi City,Lanao del Sur.
Giila ni Police Regional Office Bangsamoro Autonomous Region Director Brig Gen Prexy Tanggawohin ang dinakpan nga si alyas Thata nga nag-atubang sa kasong murder sa sala sa Regional Trial Court Branch 23 sa Molave,Zamboanga del Sur.
Saysay sa heneral nga napasayon ang pagsignit sa akusado tungod sa dungan nga operasyon kuyog ang CIDG-Zamboanga Sibubay ingon man ang Iligan City Police Office samtang nagtagu-tago sa Marawi City.
Nasuta usab sa kapolisan nga giingong nalambigit sa gun for hire activities ang akusado sa Zamboanga Province rason gikonsiderar kini nga national most wanted person.
Naggahin usab ang estado sa premyong salapi balor 140-mil pesos ngadto sa mga tawo nga makatudlo sa lokasyon aron mapadali ang pagdakop sa akusado.
