Nagpasidaan si NBA Commissioner Adam Silver nga posibleng mas bug-at ang silot sa mga koponan nga mapamatud-an nga tinuod nga nagpapildi o nag-“tanking.”
Sa iyang pahayag atol sa All-Star Weekend, giingon ni Silver nga mas daghan karong tuiga ang maong pamatasan kumpara sa miaging mga tuig.
Kini human multa-an ang Utah Jazz og $500,000 ug ang Indiana Pacers og $100,000 tungod sa pagdumala sa roster ug pagpugong sa oras sa duwa sa ilang mga importante nga magdudula.
Gidugang pa sa opisyal nga seryoso ang liga sa pagpanalipod sa kaangayan sa dula, mao nga gawas sa multa, giusisa na sa competition committee ang posibleng kausaban sa sistema sa draft lottery.
Sa laing bahin, gipahibalo usab ni Silver nga pagahisgutan sa board of governors meeting sa Marso ang posibleng pagdugang og bag-ong koponan sa NBA, bisan wala pa’y klarong desisyon kung sa Las Vegas ba o sa Seattle ibutang ang mga bag-ong koponan. (James Oliver)
