CAGAYAN DE ORO CITY – Andam na ang National Bureau of Investigation o NBI-10 nga sikupon ang board of directors sa kompaniyang Verde Soko Philippines Incorporated nga responsable pagpasulod sa kapi’g usa ka barko nga basura gikan sa South Korea diha sa lungsod sa Tagoloan,Misamis Oriental.
Kini kon mahuptan na nila ang kopya sa warrant of arrest batok kang Verde Soko Pres Neil Alburo ug laing tulo ka akusado sa kasong pagsupak sa Toxic and Hazardous Waste Act.
Miingon si NBI regional director Atty Patricio Bernales nga hulaton nila mahuptan ang kopya sa warrant of arrest aron sikupon ang mga akusado subay sa mando sa korte.
Samtang nakapiyansa na ang duha sa board of directors sa Verde Soko Philippines Incorporated nga unang nag-atubang pagsupak sa section 13 sa Toxic and Hazardous Waste Act o Republic Act 6969.
Namahayag si Regional State Prosecutor Merlynn Uy nga bailable ang 4 counts sa kaso nga gipasaka batok kang Verde Soko President Neil Alburo, Deolita Sabellosa ug Marcelo Ouano Jr kinsa pulos nagbaton sa warrant of arrest.
Si Uy miingon nga unang higayon kini sa rehiyon nga may mga tawo nga nakasuhan tungod sa maong kasupakan sa balaod.
Moabot sa 20 katuig nga pagkabilanggo ug magbayad sa multa ang makonbikto sa maong kaso.
Gitin-aw ni Uy nga aduna pay kaso nga ipasaka sa korte batok sa mga board of directors sa kompaniyang Verde Soko Philippines Incorporated.
Si Uy miingon nga ila pang gihulatan ang kulang nga legal requirements gikan sa Bureau of Customs o BoC.
Siya miingon nga ang maong kaso may kalambigitan sa misdeclaration sa mga basura nga nakasulod sa Tagoloan, Misamis Oriental.
Dumduman nga halos 7-mil ka tonelada sa basura ang gipasulod sa mga akusado nga walay permit sa Mindanao Container Terminal sa Tagoloan ning lalawigan sugod Hulyo ug Oktubre 2018.
