CAGAYAN DE ORO CITY – Imbestigaran sa National Bureau of Investigation 10 ang unod sa sulat nga nadawat sa buhatan ni Cagayan de Oro 2nd District Cong. Rufus Rodriguez nga dunay naglihok nga Philippine Offshore Gaming Operations o POGO facilities sa pribadong lokasyon sa Brgy Cugman ning syudad.
Kini aron masuta kon tinood ang impormasyon nga nagkupot ang dakbayan sa mga pasilidad sa POGO nga kontrobersyal nga isyu sa kauluhan.
Miingon si Rodriguez nga hangtod nga wala pa’y ilugwa nga resulta ang NBI sa imbestigasyon,angayang likayan una sa publiko ang pagpagawas sa ilang mga hukom.
Nagsumikad ang sulat nga nadawat sa kongresista human nasampit ni Pres Bongbong Marcos sa iyang State of the Nation Address o SONA ang total ban sa POGO operations sa nasud.
Samtang nakaandam usab ang Cagayan de Oro City Police Office paglusob kon dunay tinud-anay nga presensya sa POGO operations nga naglihok dinhi sa syudad.
Kini ang gibutyag ni COCPO spokesperson Lt Col Evan Viñas sa pangutana kon aduna ba’y ilang napanid-an nga POGO facilities nga nag-operate sa bisan sa nga bahin sa dakbayan.
Namahayag ang opisyal nga negatibo sila sa maong impormasyon nga nahuptan ni Rodriguez.
Apan siya mibutyag nga kanunay’ng abli ang COCPO nga mosanong sa sugo sa nasudnong gobierno ilabina kon makakuha sila’g ensaktong impormasyon batok sa POGO operations ning dakbayan.
Apan gihagit sa Iglesia Filipina Independiente o IFI si Pres Bongbong Marcos nga hingpit wad-on ang kurapsyon kay kini ang nagtukmod kon nganong nahimugso ang POGO operations sa nasud.
Kini ang reaksyon ni IFI Bishop Felixberto Calang kabahin sa mando ni Pres Marcos nga hingpit pagbungkag sa POGO nga tinubdan sa pipila ka dagkong kremin didto sa kauluhan.
Namahayag si Calang nga walay paglihok sama sa POGO kon hingpit usab mapatay ang kultura sa kurapsyon nga mikuyanap na’g maayo dinhi sa nasud.
