CAGAYAN DE ORO CITY – Nadawat na sa National Bureau of Investigation o NBI ang hangyo sa lokal nga kagamhanan ning syudad nga motabang aron mapadali ang kasulbaran sa kasong pagpusil-patay sa usa ka enforcer sa Roads and Traffic Administration o RTA diha sa Brgy Puerto ning syudad.
Gibutyag ni NBI 10 regional director Atty Patricio Bernales nga ila nang gisugdan ang imbestigasyon ug paningkamutan nga mapadali ang pagsulbad sa kaso kuyog ang ubang investigating teams.
Mitanyag ang kagamhanan ning syudad sa P500,000 cash reward ngadto sa makahatag impormasyon sa nahimutangan sa suspek sa krimen.
Samtang giangkon ni City Police director Colonel Henry Dampal nga ilang gidoble ang ilang pagpaningkamot nga madakpan ang suspek sa pagpatay sa traffic enforcer nga si Mark Langam IV.
Kini ilabina nga gihatagan lamang sila’g usa ka semana ni Police Regional Office -10 Reg Dir Brig Gen Rolando Anduyan nga masulbad ang kaso ug mahataga’g hustisya ang kamatayon sa biktima.
Si Dampal miingon nga magkuyog na ang mga pulis,CIDG-10 ug National Bureau of Investigation-10 aron mapadali ang pagsikop sa suspek.
Samtang gitin-aw ni Dampal nga iya na lamang isalig kang Anduyan ang hukom nga adunay opisyal nga tangtangon sa puwesto sa Puerto Police Station tungod sa kamatayon ni Langam sa miaging semana.
