CAGAYAN DE ORO CITY – Ipaubos sa re-autopsy karong adlawa sa National Bureau of Investigation o NBI-10 ang patay’ng lawas sa menor de edad nga giingong gikuhaan sa internal organs sa pipila ka personahe sa Northern Mindanao Medical Center ning syudad.
Gibutyag ni Police Senior Chief Master Sgt Apollo delas Alas, imbestigador sa Cogon Police Station nga nagpadala na sila’g letter of request aron makuha ang resulta sa unang otopsiya nga gihimo sa NMMC.
Dugang niini nga gidawat na usab sa NBI ang ilang request nga subling e-re autopsy ang patay’ng lawas ni Chad.
Una nang nadiskobre sa embalsamador sa Everlasting Funeral Parlor nga wala nay utok ang bata ug papel na lamang nga kinumot ang sulod sa gitahi nga tiyan niini.
Samtang nasibog sa adlaw’ng Miyerkules ang paglubong sa 15 anyos nga batang lalaki kinsa unang gikuhaa’g internal organs samtang nabugtuan sa kinabuhi diha sa NMMC sa miaging semana.
Kini human personal mihangyo ang inahan nga si Charlotte Gamao nga ipaubos sa laing otopsiya ang iyang anak alang sa posibleng pagkaso batok sa pipila ka kadagkuan sa NMMC.
Siya miingon nga ila unang hulaton nga ma-re autopsy ang patay’ng lawas sa iyang anak sa NBI aron mahibal-an kon adunay kamatooran ang pahayag sa embalsamador nga wala nay internal organs ang iyang anak.
Gipanganti ni Gamao nga manubag ang bisan kinsa nga mipasipala sa parte sa lawas sa iyang namatay’ng anak.
Hisayran nga hangtud karon wala pay tubag ang mga personahe diha sa NMMC sa maong kontrobersya.
