CAGAYAN DE ORO CITY – Ipasaka na sa National Bureau of Investigation o NBI-10 ang kasong kriminal batok sa negsoyanteng Taiwanese sa piskalya sa syudad sunod semana.
Kini may kalabutan sa nakuha nga ‘fake candies’ ug ubang paraphernalia gikan sa warehouse nga naronda sa NBI ug Bureau of Internal Revenue sa Brgy Mohon,Tagoloan,Misamis Oriental sa miaging Hulyo ning tuiga.
Miingon si NBI regional director Atty Patricio Bernales nga maoy kasuhan nila si Huang Teng Pee ug laing duha ka negosyante nga nagpadagan sa fake candies.
Dugang ni Bernales nga katingad-an usab ang identities sa maong mga negosyante kay nagbaton kini sa walay klarong address ning syudad.Samtang wala mabalaka ang kampo sa Taiwanese businessman nga si Huang nga kasuhan na kini sa NBI-10 sa piskalya sa syudad sunod semana.
Kini human unang gikompirmar ni NBI regional director Atty Patricio Bernales nga ipasaka nila ang kasupakan sa Republic Act 8293 o Intellectual Property Code of the Philippines batok Huang.
Miingon ang abogado ni Huang nga si Atty Teofredo Rojas nga kumpiyansa sila nga mabasura ang kaso ilabina nga lahi ang nakapangalan sa search warrants nga gigamit sa NBI pagronda sa warehouse.
Suportado usab sa kampo ni Huang nga kasuhan ang mga negosyanteng Intsik nga naggamit sa warehouse kay nakahatag kini’g kadaot ngadto kaniya.
Si Huang ang nag-abang sa 7 ektarya nga yuta sa Phividec sa iyang negosyo kaniadto sa Tagoloan ning lalawigan.
