Andam ang National Bureau of Investigation (NBI) sa pagpatuman sa arrest warrant nga ipagawas sa INTERPOL o International Criminal Police Organization.
Kini ang katin-awan ni NBI Director Atty. Melvin Matibag kalabot sa gilugwa nga listahan sa International Criminal Court (ICC) sa mga co-perpetrators sa kasong Crimes Against Humanity nga gi-atubang ni kanhi President Rodrigo Duterte, didto sa The Hague Netherlands.
Namahayag si Matibag nga adunay klaro ug lig-on nga koordinasyon ang ahensya sa INTERPOL aron masiguro ang hapsay nga implementasyon sa warrant kon adunay ipadalang dokumento kanila.
Dugang pa ni Matibag, ang NBI adunay kapasidad ug kahibalo sa pagduso sa mga proseso nga may kalabutan sa international cooperation, ug gilauman nga ang tanang lakang nga buhaton magpabilin nga lig-on sa legalidad ug patas sa hustisya.
Iyang gibutyag nga ang pag-monitor ug pag-andam sa tanang posibleng direktiba gikan sa INTERPOL maoy usa sa obligasyon sa ilang ahensya.
